"Җиде юл чатында" сериалы тиздән зәңгәр экраннарда!

Әлеге иҗат җимеше Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе һәм “Татнефть” хәйрия фонды ярдәме белән гамәлгә ашырыла.

3 ай дәвамында ягулык салу станциясендә эш гөрләде, ә бүген режиссер проектның тәмамлануын игълан итте. Яңа ел алдыннан тамашачылар өр-яңа премьераны карый алачак. 

“Җәй башында, беренче эпизодларны төшерә башлаганда, без Яңа гасыр телеканалында чыгачак сериалга «Юллар чатында» дигән эш атамасы биргән идек. Йомгаклау эшенә килеп җиткәндә, барлык атмосферасына төшенеп, эчтәлеген, төшерү урынын да исәпкә алып эфирга чыгачак исемне «Җиде юл чатында» дип калдырырга булдык», — дип сөйләде сериалның сценарий авторы Альберт Шакиров.
Альберт әйтүенчә, сериаллар елга бер генә түгел, ә берничә булып чыгарга тиеш, бу безнең җитәкчелек белән күптәнге хыял, ди. Димәк, әле алда тагын зур проектлар көтелә.
ТНВ генераль директорының беренче урынбасары Илшат Сәфиуллин: «Төшерү эшләре тәмамланды, хәзер инде монтажга күчәбез. Тамашачы без төшергән сериалларны яратып карый һәм көтеп ала. Хәзерге вакытта тамашачыбыз хозурына татарча сериал җиткерә алуыбызга шатбыз. 2024нче елда төшерәчәк сериал һәм фильмның темаларын уйлый башладык инде, тиздән сценарийларын да язарга тотынабыз”, - дип, киләчәккә планнар белән дә бүлеште.
«Җиде юл чатында» сериалы 20 сериядән торачак . Анда тамашачыларга бер автозаправка станциясе кысаларында барган вакыйгалар, тормыш хәлләре турында сөйләнәчәк. Ягулык салу станциясе — юллар, кешеләр язмышлары кисешә торган урын. Бирегә һәркем үз уйлары, проблемалары, дөньяга карашы, тормыш «багажы» белән килә һәм һәрберсе үз юлын табарга тели.

Үрнəк саналган заманча ягулык салу станциясенə үзəк офистан Ясминә исемле яңа хезмəткəр җибəрəлəр. Ясминә исə килə-килештəн үзенең моңарчы җитəкчелек игътибарсыз калдырган тəкъдимнəрен тормышка ашырырга тотына һəм тиз арада нəтиҗəгə ирешеп барысына да ни дəрəҗəдə булдыклы икəнлеген исбатларга омтыла. Аның юлында көтелмəгəн бердəнбер киртə - шушында ук официант булып эшләүче элекке мəхəббəте Булат. Сүрелеп бетмəгəн хислəре, җитəкченең кырыслыгы белəн көрəшеп, Ясминә шундый үзгəрешлəр башлап җибəрə ки, аларга ияреп бөтен заправка коллективының һəм килүче клиентларның да тормышлары да көтелмəгəн борылышлар ясый