«Игәүләү»дән туйган ир урманда хатыныннан «котылган»

Җирле тикшерү комитетының матбугат хезмәте хәбәр итүенчә, ир кеше җинаять кылырга алдан ук әзерләнгән. 3 апрель көнне ул хатынын урманга алып барып буып үтергән һәм аның мәетен яшереп куйган.

Шәһәргә кайткач, ир кеше хатынының әти-әниләренә һәм полициягә аның югалуы хакында хәбәр иткән. Берничә көн дәвамында хатынын "эзләү"дә актив катнашкан.

Бераздан ир кеше хатынын үтерүе хакында әйткән һәм полиция хезмәткәрләренә җинаять урынын, мәетне күрсәткән. Ә үзенең шундый коточкыч адымга баруын ул хатыны гел "игәүләп" торудан, нервысы түзмәгәнлектән, дип аңлаткан.