Калган эшкә кар ява, ә экологлар штраф сала

Юл буйларында, ишегалла­рында, су саклау зона­ла­рындагы комлы-тозлы кар өем­нәре закон бозу булып санала. Кар махсус урыннарда гына җыелырга тиеш. Казанда андый 20 мәйданчык бар: шуларның алтысы - кар эретү станциясе, ундүрте - кар чүплекләре.

Татарстанның экология һәм табигый байлыкларны саклау министры Фәрит Габделганиев сүзләренчә, тиешсез урынга чүп ташлау проблемасы бөтен республика буенча таралган.

- Карның инде күптәннән яуганы юк, ләкин кар өемнәре әле дә җыелмаган, - дип төртеп күрсәтте министр Себер тракты урамында урнашкан Кузов төзекләндерү үзәге тирәсендәге берничә метр биек­лектәге кар өеменә.

- Кар өемнәрен юл буйларына чыгару, ишегалларында җыю, кая да булса яшерергә тырышу - шәһәр төзекләндерү кагыйдәләрен үтәмәү дигән сүз. Җыелган кар аркасында яшел үсентеләр дә, су объектлары да зыян күрә. Без көндез генә түгел, төннәрен дә рейдларга чыгабыз. Закон бозучыларның исемлеген, кышкы сезон тәмамлангач, үз сайтыбызда эләчәкбез, - диде Фәрит Габделганиев.

Экологлар исә кар өемнә­рен экспертизага алды. Кар гына түгел, анда җыелган ком, тоз, машина газлары да әйләнә-тирәгә зур зыян сала икән. Закон бозучыларны экологлар административ җаваплылыкка тартачак.
Шулай ук рейд барышында экологлар «Техстрой» полимер торбалар төзү заводының машина тукталышы тирәсендәге кар өемнәрен тикшерде. Биредәге кар Нокса елгасына зыян сала икән.

Синоптиклар хәбәр итүенчә, бу көннәрдә Татарстанда кар явачак. Бу исә экологлар тагын көн-төн рейдлар белән йөриячәк дигән сүз. Тиешсез урында кар өемнәре яту турында хәбәр биргән кешегә министрлык акча түләячәк. Мәгълүмат Telegram һәм WhatsApp кушымталарыннан кабул ителә.