Камал театры селфи бәйгесе игълан итте

110 еллык юбилее уңаеннан Г.Камал исемендәге Татар дәүләт Академия театры иң үзенчәлекле селфига бәйге игълан итә. Бәйгедә катнашыр өчен машинаның арткы тәрәзәсенә Камал театры логотибын ябыштырып фотога төшәргә һәм социаль челтәрләрдә урнаштырырга кирәк. Җиңүчеләрне Камал театрының 110-еллык юбилеена багышланган гала-концертка чакыру билетлары һәм истәлекле сувенирлар көтә, дип хәбәр итә театрның матбугат хезмәте.

Бәйгенең икенче этабы - фотоны Вконтакте яки Инстаграм социаль челтәрендә #театрукамала110лет #камалтеатрына110ел хэштеглары белән урнаштырырга һәм комментарийларда Камал театрының 110-еллык бәйрәменә теләкләр дә язарга кирәк.

10-11 декабрьдә Камал театрының баш режиссеры Фәрид Бикчәнтәев җитәкчелегендәге жюри иң үзенчәлекле 10 фотоны сайлый. 12 - 18 декабрьдә Камал театрының официаль төркемендә иң яхшы фотоны сайлап алу максатыннан ачык тавыш бирү игълан ителә. Җиңүче 22 декабрьдә - татар театрының туган көне бәйрәмендә бүләкләнә.

Ачык тавыш бирү этабына узган иң яхшы 10 фотосурәт авторлары, Камал театрының 110-еллык юбилеена багышланган зур гала-концертка чакыру билетлары ота. Төп җиңүчене исә, иң кадерле бүләкләр: спектакльләргә чакыру билетлары, футболка, стена календаре, көндәлек дәфтәре һәм USB-флеш-накопитель көтә.