«КАМАЗ» һәм җиңел машина белән авариядә өч кеше һәлак булган

Беренчел мәгълүматлар буенча, югары тизлектә килүче КамАЗ шоферы алдыннан баручы Шевроле машинасын бәрдереп китә.

Җиңел автомобиль каршы яктан килүче машиналарны уздырып җибәрү өчен юлда туктый һәм сул якка борылырга ниятли. Ә КамАЗ шоферы алда баручы машинаның туктап калуын абайламый. 

«Шевроле»ның өч пассажиры алган яраларыннан урында ук һәлак булган. Чит ил машинасы йөртүчесе һәм аның дүрт яшьлек пассажиры хастаханәгә озатылган.

Көчле бәрелүдән җиңел машинаның арткы өлеше изелеп беткән, дип хәбәр иттеләр республиканың Дәүләт автомобиль инспекциясендә.

ЮХИДИ хезмәте юл хәрәкәтендә катнашучыларның барасын да сак булырга һәм юл хәрәкәте кагыйдәләрен үтәргә өнди.

Социаль челтәрдә таралган мәгьлүматларга караганда, һәлак булучы кызларның берсе Яна Никитенко. Ул Чаллыда ЗЯБ бистәсендә яшәгән. Әтисе, үги әнисе, сеңлесе һәм 4 яшьлек кызы белән пляжга барулары булган. Алда әйтүебезчә, җиңел машинадагы өч хатын-кыз да үлгән.

Мәрхүмә Янаның 4 яшьлек кызы Казанга, республика балалар клиник хастаханәсенә күчерелгән. Шевроле йөртүчесе Чаллының ашыгыч ярдәм күрсәтү хастаханәсендә дәвалана. 
Фотода һәлак булган Яна.