Казанда узачак Гуммерт исемендәге халыкара бәйгенең приз фонды 650 меңне тәшкил итә

Анда Россиянең ундүрт шәһәреннән һәм чит илләрдән 127 музыкант катнаша. Конкурсны Татарстан Президенты ярдәме белән Мәдәният министрлыгы, музыка көллияте, консерватория оештыра. Ул көллият директоры Айрат Җаббаров тәкъдиме белән үткәрелә.
Конкурсның Гуммерт исеме белән аталуы очраклы түгел. Заманында композитор, пианиночы Рудольф Гуммерт хор һәм симфоник оркестрның дирижеры була. Ул Казан музыка көллиятенә нигез салучыларның берсе.
Бәйгенең максаты талантлы музыкантларны югары уку йортларына укырга кертүдә ярдәм итү һәм иҗат коллективларына эшкә урнаштыру.
Жюрига Англия, Австрия, Испания илләреннән һәм Мәскәү шәһәрләреннән иң оста скрипкачылар чакырылды. Шулай ук үзебезнең музыка уку йортлары профессорлары, доцентлары да катнашучыларга бәя бирәчәк.
Конкурс скрипка, альт, виолонченчель, контрабас номинацияләрендә уза. Бүләкләү фонды 650 мең сум. Конкурс вакытында остаханәләр оештыру каралган. Конкурсның йомгаклау концерты Казан Ратушасында узачак.