Казанның «Харалы күле»нең исеме ник сәер?

Әлеге сазлыклы урынны күмәргә дигән сүз чыккач, 2013-2014 елларда Татарстан Президенты Рөстәм Миңнеханов анда парк булдырырга карар кылды. Моны әйләнә-тирәдә яшәүчеләр дә хуплады һәм озак көттермичә, эшкә дә керештеләр. Шулай итеп, «Харалы күл» сакланып калды, андагы үсемлекләр, кошлар, хайваннар, балык­лар зыян күрмәде.

Ни өчен күлнең исеме шундый сәер соң? Баксаң, бу күлдә безнең якларда сирәк очрый торган хара исемле суүсем күпләп үсә икән. Гади хара - макроскопик суүсем, 15-20 см биеклектә, карасу яшел төстә. Безнең якларда күпләп үсә торган нарат үләненә (наратбашка) охшаган. Бу үсемлек «Кызыл китап»­ка кертелгән. Татарстанның өч күлендә һәм Чувашстан Республикасында харалар бар.

Гади хара суүсеменең яшь, йомшак үсентеләре балыкларга азык булып тора. Үсентеләр арасында вак балыклар яшеренә. Швейцариядә мондый суүсемнәр шактый күп булганлактан, аларны ашлама буларак та файдаланалар. Дөньяда хара суүсемнәренең якынча 300 төре билгеле.

«Харалы күл»дә төрле балык­лар үрчи, әмма аларны кармакка гына тотарга рөхсәт ителә. Шулай ук бу күлне бакалар, тритоннар, су күселәре дә үз иткән. Камыш белән уратып алынган күлдә кыр үрдәкләре дә шактый. Күл буендагы камышлыкта оя ясап, үрдәкләр бәпкә чыгара. Алар өчен күл уртасында «түбәле йорт» та ясап куелган. Монда килүчеләр, күл эченә кертеп ясалган күпергә кереп, ул үрдәкләрне сыйларга ярата. Мондый сыйга акчарлаклар да шат.

Паркта ала карга, саескан, миләш чыпчыклары да җитәрлек.
Паркның читендә балалар мәйданчыгы төзелгән. Биредә чисталык күзгә ташлана. Өмәләр вакытында бик күпләр булышырга килгән. Паркны тагын да матурлап, кешеләрне күбрәк җәлеп итәрлек дәрәҗәгә җиткерәсе иде.