Кыш Бабай костюмында йөргән педофил балаларны конфетлар белән кызыктырган

Хәзер шикләнелүче ир-ат камерада.

Бөгелмәдә яшәүче 54 яшьлек ир Кыш Бабай костюмы киеп урамнар буйлап велосипедта җилдергән. Ул нәкъ менә балалар янында гына туктаган һәм конфетлар өләшкән. Шулай итеп, ул аларны үз өенә чакырган. Бу хәл ел саен кабатланган, хәтта кыш көне балалар өчен таулар да төзегән. Шуның өчен шәһәрдә дан казанган. Ләкин моның бер хәйләкәр уй икәнен беркем дә белмәгән.

Тиздән "Кыш бабай"ның велосипедта йөрүләре тәмамлана. Ир-атны полиция тоткарлаган, аңа карата «14 яше тулмаган кешегә карата сексуаль характердагы ирексезләп кылынган гамәл» һәм “Балигъ булмаганнар порнографик сурәтләре белән материаллар һәм предметлар әзерләү һәм әйләнешкә кертү” маддәсе буенча җинаять эше кузгатылган.

Тикшерүчеләр ачыклаганча, 2024 елның җәендә әлеге шикләнелүче ир танышларының балконын төзекләндерергә килешкән. Олылар өйдә булмаган вакытны туры китереп, ул хуҗаларның 6 яшьлек кызын мыскыл иткән. Шулай ук боларның барысын да үзенең кесә телефонына төшергән, ә аннары язмаларны интернетка урнаштырган.

Тикшерү комитетының төбәк идарәсе әлеге ир-атның башка шундый хокук бозуларга да катнашы булырга мөмкин дип саныйлар. Шуңа күрә әлеге кеше тарафыннан кылган җинаятьләр турында мәгълүмат булса, шунда ук хокук саклау органнарына хәбәр итүне сорыйлар.