Өметебезне акламадылар

2016 елгы футбол буенча Европа чемпионатыннан төшеп калганнан соң, Россия җыелмасыннан күпләр канәгать түгел. Шул уңайдан җыелма команданы куып таратуны сорап, 300 меңнән артык кеше имза куйган. Алар фикеренчә, яңа состав тупларга кирәк. Ярты миллион тавыш җыелгач, аны Россия Президентына да юлламакчылар.

Исегезгә төшерәбез: Франциядә узган Евро-2016да төркем этабында Англия белән тигез исәпкә (1:1) уйнап һәм Словакия (1:2) белән Уэльска (0:3) оттырып, Россия җыелмасы плей-оффка чыга алмады. Җыелманың тренеры Леонид Слуцкий команданың уңышсыз уены өчен гаепне үз өстенә алды. Ил командасы белән башка кеше эшләргә тиеш дип өстәп, үзенең китәчәген әйтте.