Новосибирскида журналда билгеләрне төзәткән укучы баланы мәхкәмәгә бирергә җыеналар

Тикшерү барышында узган елның язында гимназия укучысының махсус программа ярдәмендә сыйныф журналының логинын һәм паролен ачыклавы билгеле булган. Ул әлеге мәгълүматларны дусты белән дә бүлешкән. Бер ай буена 16 яшьлек гимназия укучысының журналдагы үзенең һәм иптәшләренең начар билгеләрен төзәткәнлеге мәгълүм.

Узган елның ноябрендә укытучылар электрон журналдагы үзгәрешләрне күрәләр һәм бу хакта полициягә хәбәр итәләр. Россия Федерациясенең Җинаять Кодексы буенча, әлеге җинаять өчен 200 мең күләмендә штраф яки ике елга чаклы иректән мәхрүм итү җәзасы каралган.