«Печән начар булса да, чаба башларга кирәк, чөнки икенче кат чабу соңга калачак»

- Бу көннәр - азык әзерләү өчен иң яхшы вакыт, бер атнадан инде соң булачак. Һәр югалткан көн саен туклыклылык кими, массаның үсүен көтүдән мәгънә юк, - дип белдерде Татарстан авыл хуҗалыгы һәм азык-төлек министры урынбасары Илдус Габдрахманов.
Сүз уңаеннан, республика хуҗалыкларына барлыгы 1,8 миллион тонна азык берәмлеге яки шартлыча бер баш терлеккә 30 центнер азык берәмлеге әзерләргә кирәк. Азык әзерләү Әлки (20,4 мең тонна сенаж), Зәй (19,7 мең тонна), Азнакай (14,8 мең тонна) һәм Сарман (15,8 мең тонна) районнарында актив рәвештә алып барыла. Ә менә Әлмәт һәм Минзәлә (1,4әр мең тонна), Алабуга (1 мең тонна) һәм Тукай (0,4 мең тонна) районнары калыша.

Сүзен-сүзгә

Татарстанның Баш ветеринария идарәсе җитәкчесе Алмаз Хисаметдинов:

- Быел терлек азыгы әзерләү җиңел түгел. Һава шартлары, башка еллардагыга караганда, үзгәрәк булды бит. Шунлыктан үлән бик начар, кыска, ләкин без аны чаба башларга тиеш, чөнки икенче кат чабу соңга калачак. Азык әзерләү буенча 20-25 көнгә соңардык инде. Июль-августта һава торышы яхшы булса, узган елдагы кадәр азык әзерли алырбыз дип ышанам.

Әлки районы авыл хуҗалыгы һәм азык-төлек идарәсе җитәкчесе Роберт Гадиев:

- Быел печән, алдагы елларга караганда, сыеграк. Өстәвенә, көн дә явып торган яңгырлар да азык әзерләргә комачаулый, чапкан печәнне дә җыеп булмый. Явым-төшем 20 мм дан артып китте. Хәзер безнең максат - печәннең беренче катын тизрәк чабып бетерү. Шулай иткән очракта гына икенче катны чабарга өлгерәчәкбез. Печәннең беренче катын сенажга чабабыз. Гомумән алганда, районның 23 мең гектар мәйданындагы үләннәр азыкка чабылачак. Шуларның 13 мең гектары - күпьеллык үләннәр.

«Азнакай» агрофирмасының терлекчелек буенча директор урынбасары Илдар Гарифуллин:

- Күпьеллыкларның беренче катыннан, нигездә, сенаж салабыз, икенче каты - печәнгә. Җәй соң килү сәбәпле, быел терлек азыгы әзерләү дә соңарды. Шуңа да беренче катны сыйфатлы һәм сыйлы чорында кыска срокларда җыеп алу - төп бурычыбыз. Бу уңайдан бар шартларыбыз да бар, егетләребезнең дә кәефе яхшы. Иң уңганы - Урманай. Алар, иң беренчеләрдән булып, сенаж сала башладылар. Сәпәй, Уразай, Сукаеш басуларында параллель рәвештә печән әзерләү эшләре дә бара. Эш ике сменада оештырылды. Бер сменада эшләүчеләр иртәнге өчтән үк эшкә кузгалалар.