#Кыскача яңалыклар 17 июнь 2017, 10:04

«Рамазан - изге гамәлләр ае» акциясенә кушыл

17 июнь 2017, 10:04

Татарстан мөселманнары диния нәзарәте игълан иткән "Рамазан - изге гамәлләр ае" дигән акция кысаларында физик мөмкинлекләре чикле кешеләргә нәзарәтнең "Зәкят" хәйрия фонды тарафыннан күмәк авырлыгы ярты тоннага җиткән азык-төлек җыелмалары бирелде.

Скопировать ссылку

Әлеге изге эшкә Татарстан мөфтие Камил хәзрәт Сәмигуллин үзе кушылды. Үзенең нәсыйхәтләре һәм изге теләкләрен әйтеп, ул күчтәнәчләр белән тулы илле җыелманы тапшырды.

Форсаттан файдаланып, мөфти хәзрәтләре рамазанның фазыйләтләре, әлеге айда башкарылган гамәлләрнең савабы күп тапкырга артуы һәм ислам диненең кешене изгелеккә генә чакыруы турында сөйләде.

Күчтәнәчләрне мохтаҗлар ачык күңел һәм зур рәхмәтләр әйтеп алды. "Элек мин мөселманнарның юмарт булуларының сәбәбен аңламый идем. Хәзер инде динегезнең мәрхәмәтлеккә чакыруын аңладым", - дип белдерде хәйрия акциясендә катнашкан бер ханым.

Тапшырылган азык-төлек җыелмаларына он, шикәр, чәй, токмач, дөге, карабодай һәм ясмык керде. Изге рамазан ае ахырына кадәр "Зәкят" хәйрия фонды мохтаҗларга, күп балалы һәм аз керемле гаиләләргә, авыруларга тагын 240 шундый күчтәнәч өләшәчәк.