Республика ифтары кабат "Казан-Арена"да үткәрелә

Соңгы ике елда 45 мең кеше сыйдырышлы стадионда дөньякүләм спорт чаралары уздырылганлыктан, ике ел рәттән ифтар Теннис академиясендә үтте. Ике еллык тәнәфестән соң быел ул кабат "Казан-Арена"да оештырыла. Ифтарны оештыручылар составы да үзгәрешсез кала. Авыз ачу мәҗлесенә халыкны быел да Татарстан мөселманнары диния нәзарәте, "Казан-Арена" акционерлык җәмгыяте һәм Россия мөселман эшмәкәрләре ассоциациясе җыячак.

– Ифтарга әзерлек тулы көченә бара. Ифтарны тиешле дәрәҗәдә үткәрү өчен, елдагыча, волонтерлар җәлеп итәбез. Бүгенге көнгә 1200 волонтер тупладык. Шунысы сөенечле: быел алар бик тиз җыелды. Араларында 79 яшьлек әбиләр дә бар. Барысы да савап эшләп калырга ашыга. Волонтерлар 20 майдан ук эшкә керешәчәк. Алар мәҗлес үткәрү урынын оештыру, өмә үткәрү, өстәлләрне кую, келәмнәр җәю, азык-төлекне пешерү өчен әзерләү, яшелчә һәм җиләк-җимешләрне юу белән шөгыльләнәчә, – дип сөйләде Диния нәзарәтенең социаль үсеш бүлеге җитәкчесе Айгөл Биктимерова.

Пылау пешерү өчен 1,3 тонна дөге алып куелды. 15 000 чәк-чәк, 600 кг кәнфит, 600 кг казылык эшләнмәләре сатып алынган. Авыз ачучылар өчен төзелгән меню традицион рәвештә хөрмә, өрек, су, җиләк-җимеш, сок, пыла, яшелчә, ит, өчпочмак, бөккән, кәнфит, чәк-чәктән тора. Бер кешелек порция 500 сумны тәшкил итә. Пылауны Казанның азык-төлек һәм социаль туклану департаменты пешерәчәк икән.