Россиядә Путинның үз кандидатурасын тәкъдим итүен хуплап имза җыю башланды

Бүгенге көннән башлап Россия Федерациясенең хәзерге Президенты Владимир Путин сайлау штабы волонтерлары Гомумроссия халык фронты һәм «Бердәм Россия» партиясе бүлекләре белән дәүләт башлыгын сайлауда сәясәтченең үз кандидатурасын тәкъдим итүен хуплап имза җыя башлый. Бу хакта ТАСС хәбәр итә.

«Ил буенча без имза җыючыларга инструктаж үткәрәбез һәм өйрәтәбез, алар имза кәгазьләрен алган көнне эшкә керешергә әзер булачак. Катнашырга теләүчеләр бик күп», - дип белдерә партиянең матбугат хезмәте «Бердәм Россия» үзәк башкарма комитеты җитәкчесе Александр Сидякинның сүзләрен.

Россия Президенты сайлау өч көн - 15 марттан һәм 17 мартка кадәр дәвам итәчәк. Үзәк сайлау комиссиясе сайлауга әзерлек буенча чаралар планын раслады.

Россиянең хәзерге лидеры Владимир Путин яңа президент срогына үз кандидатурасын тәкъдим итәргә булды. Сайлауда җиңгән очракта бу бишенче президент каденциясе булачак.

Путинның үз кандидатурасын тәкъдим итүен хуплау командасына 700дән артык кеше кергән. «Бердәм Россия» партиясе съезды бертавыштан аның кандидатурасын хуплады. Дәүләт башлыгы Үзәк сайлау комиссиясенә документларны тапшырды, соңрак алар теркәлде.

Россия Президентын сайлауда катнашырга җыенучыга 300 мең имза җыярга кирәк, өстәвенә һәр төбәккә 7,5 мең имза туры килергә тиеш. Сайлауда кандидат булып теркәлү өчен имзаларны Үзәк сайлау комиссиясенә 31 гыйнварда Мәскәү вакыты белән 18.00 сәгатькә кадәр тапшырырга кирәк.

Чыганак: "Татар-информ"