Россиядә 25 мең табиб җитми

Очрашуда беренчел медицина ярдәме күрсәтүне оештыру, пациентлар белән эшләү, медицина өлкәсен борчыган проблемалар хакында сөйләштеләр.

Татарстан – медицина өлкәсендә эш системалы оештырылган үрнәк төбәкләрнең берсе. Моны Дәүләт Думасының Сәламәтлек саклау комитеты рәисе Дмитрий Морозов та искәртте. «Президент кушкан йөкләмәләрнең вакытында үтәлеп баруы сөендерә. Үзгә­реш­ләрне халык та уңай кабул итә. Казан һәрвакыт медицина тормышының үзәгендә булды, кадрлар әзерләүдә дә сынатмый», – диде Морозов.

Делегатлар Лаеш районы, Комлы Кавал авылы фельдшер-акушерлык пунктын карады. Мәскәү кунаклары андагы эшләү шартларыннан канәгать калды. Татарстанны фельдшер-акушерлык пунктларын саклап калган сирәк төбәкләрнең берсе, дип атадылар. «Санитар хезмәткәрләрнең күзләренә карап та, барысы да аңлашыла. Кунакларны кабул иткәндә, махсус эш тәртибен оештырырга була, ә менә кешенең карашы алдый алмый», – дигән Морозов.

Сөйләшү барышында беренчел звено медицинага зур игътибар бирергә кирәклеге әйтелде. Диспансеризация узуның мөһимлегенә басым ясалды. Киләчәктә исә авыруларны дәвалаудан тыш, кисәтү чараларына күбрәк игътибар бирә башлаячаклар.

Россия Сәламәтлек саклау министрлыгында кадрлар сәясәте һәм медицина белеме бирү департаменты директоры Ирина Купеева әйтүенчә, медицина өлкәсендә никадәр төзелеш башкарылса да, хастаханәләр, сырхауханәләр яңартылса да, медицина учреждениеләре табиблар белән тәэмин ителмәсә, сыйфатлы ярдәм күрсәтү мөмкин түгел. Хәтта кисәтү чаралары турында сүз барганда да табиблардан башка булмый.

Россиядә исә барлыгы 25 мең табиб җитми икән. Киләчәктә бу проблеманы хәл итү максатында «студент-остаз» системасы нигезендә, табибларны әзерләүнең яңа төрен кулланырга җыеналар.

Киләчәктә безнең республика тәҗрибәсен башка төбәкләр дә куллана алачак. Медицина өлкәсендәге Татарстан казанышларын Дмитрий Морозов башкаларга да күрсәтергә тели. Бу уңайдан ул Дәүләт Думасында күргәзмә оештырырга тәкъдим итте.

Фото: tatarstan.ru