«Рубин» – ЦСКА уены вакытында вакытлы машина калдыру урыннары булдырылды

Шул сәбәпле, бүген 17.30-23.30 сәгатьләрдә транспорт хәрәкәтенә вакытлыча чикләү кертелә. Бу хакта Татарстан буенча Эчке эшләр министрлыгының матбугат хезмәте җиткерә. Исегезгә төшерәбез, Россия футбол чемпионатының әлеге уены FIFA Конфедерацияләр Кубогына әзерлек сәбәпле тест матчы буларак уздырыла.

Хәрәкәт өченче транспорт дамбасында, шулай ук "Казан Арена" янында урнашкан Арбузов, Ямашев, Гаврилов, С.Хәким һәм Чистай урамнарында чикләнә.

Барлык шәһәр транспорты гадәти режимда эшләячәк. Әмма "Адоратский" тукталышыннан "Ветеринария институты"на кадәр җирдә аларның хәрәкәте тукталышсыз булачак. Шулай ук троллейбус хәрәкәте чикләнә.
Тамашачыларның транспорт чараларын кую өчен 10 урын каралган: "Олимп" спорт комплексы (Чистай урамы 65); "Татнефть Арена" янындагы паркинг (Сибгат Хәким урамы 23); "Леруа Мерлен" гипермаркеты Фатих Әмирхан проспекты 3); "Ак Барс" көрәш сарае, (Фатих Әмирхан проспекты 1); "Парк Хаус" сәүдә үзәге (Хөсәен Ямашев проспекты 46); "Тандем" сәүдә үзәге (Ибраһимов проспекты 56); "METRO Cash &Carry" сәүдә үзәге (Мулланур Ваһитов урамы 4); "Южный" сәүдә-күңел ачу үзәге (Җиңү проспекты 91); "Мега" сәүдә үзәге (Җиңү проспекты 141); "Казанская Ривьера" (Фатих Әмирхан проспекты 1а).

^{Татар-информ}