Санитар-экологик икеайлыкның беренче нәтиҗәләре: 459 тәртип бозу, 210 законсыз чүплек, 288 беркетмә тутырылган

1нче апрельдән Татарстанда традицион санитар-экологик икеайлык башланып китте. Республиканың беренче шимбә өмәсендә 20 меңләп кеше катнашты. Казанда беренче экологик чистарту чарасын вакытында исә Түбән Кабан күле яр буйларын җыештырдылар.

Татарстан экология һәм табигый байлыклар министры Фәрит Габделганиев сүзләренчә, санитар-экологик икеайлыкның беренче атнасында табигатьне саклау буенча 459 тәртип бозу ачыкланган, 288 протокол төзелгән, җаваплылыкка 21 предприятие һәм оешма, 63 җаваплы кеше тартылган.

Моннан тыш, узган атнада 210 законсыз чүплек ачыкланган һәм аларның 92се бетерелгән. Казанда 1-8 нче апрель көннәрендә 24 тәртип бозу билгеләнгән, 2 юридик, 2 җаваплы һәм 2 физик зат җаваплылыкка тартылган. Законсыз чүплек Авангардная урамындагы 91 йорт янында табылган. Биредә яшәүчеләр чүпләрен тәрәзәдән ата-ата чүплек өеме барлыкка килгән.

^{Фото: kazan.bezformata.ru}