#Кыскача яңалыклар 13 апреля 2019, 07:30

«Шаян ТВ» яңа реалти-шоу әзерли

13 апреля 2019, 07:30

«Шаян ТВ» каналы татар егетләре тормышы турында яңа реалити-шоу әзерли. Бу хакта «Шаян ТВ» балалар каналының яңа студия комплексы ачылу һәм яңа телепроектларны тәкъдим итүгә багышланган матбугат конференциясендә каналның җитәкчесе Рамилә Сәхабетдинова хәбәр итте.

Скопировать ссылку

-22 апрельдән безнең каналда «Караш» дип аталган реалити-шоу эфирга чыгачак. Проект өч татар егетенең тормыш-көнкүреше, шөгыльләре хакында булачак, - диде ул.
Рамилә Сәхабетдинова әйтүенчә, проектның максаты заманча сыйфатлы музыка аша балалар, яшьләр арасында татар телен популярлаштыру.
Шулай ук телеканал балалар өчен спектакльләр күрсәтергә тели.
-Безнең театрларда балалар өчен язылган спектакльләр күрсәтелми, бу зур проблема. Театрларның репертуарында андый спектакльләрнең аз булуы уңай күренеш түгел. Балалар театрлары ярдәмендә спектакльләр төшерергә, аларны телеканалда күрсәтергә телибез. Бу хакта Ирада Әюпова белән дә сөйләштек, - диде Рамилә Сәхабетдинова.
Телеканал Г.Кариев исемендәге яшь тамашачы театрының өч спектаклен куярга планлаштыра. "Әтнә дәүләт драма театрының «Бәхет кошы» һәм Камал театрының «Кәҗә, сарык һәм башкалар» спектаклен дә карарга мөмкин булачак, - диде каналның редакторы Ләйсән Һадиуллина.
Хәзерге вакытта «Шаян ТВ» каналында егермедән артык проект эфирга чыга. Алар арасында – «Бергәләп өйрәник», «Акыл батл», «Уймак», «Шаян дәрес», «Шаян тарих», «Шаян тәм-том», «Сәйлән» программалары бар.