Шәһәр мэры миллионлаган чәчәк кирәк, ди

Тиздән башкалабызда узачак Спортның су төрләре буенча Бөтендөнья чемпионатына җир шарының 200 почмагыннан 20 меңнән артык кунак киләчәк. ФИНАга әзерлек кысаларында шәһәр мэры Илсур Метшин юлларның торышын, кунаклар узачак маршрут буенча урнашкан йортларның фасадларын тикшерде, кунаклар аэропорт ягыннан Универсиада проспектына, шуннан Миллениум күперенә, аннары су спорты сарае юнәлешендә барачак. Шәһәр мэры шул юл буйларында кунакларны чәчәкләр, газоннар каршыларга, яшеллек күбрәк булырга тиеш, дип саный.

- Бу төп трасса, шуңа да әлеге зонага аеруча игътибарлы булырга, аны тагын да яшелләндерергә кирәк, кунаклар матурлыкны күреп ах итәрлек булсын, - ди мэр. Шул рәвешле, Казан кунакларны миллионлаган чәчәкләр белән дә гаҗәпләндерергә тели.