Татарстанда ел башыннан бирле коклюш (бума ютәл) белән меңнән артык кеше авырган

Гыйнвар белән чагыштырганда авыручылар саны 8 тапкырга кимегән. Шулай ук республикада ел дәвамында кызамыкның 232 очрагы теркәлгән. Бу хакта матбугат конференциясендә Роспотребнадзорның Татарстан буенча җитәкчесе урынбасары Любовь Авдонина сөйләде.

Татарстанда коклюш буенча вәзгыять тотрыклы, дип билгеләде ул. Март аеннан авырулар саны кимү теркәлә, аның иң югары ноктасы 2024 елның I кварталына туры килгән. «Узган чорда барлыгы 1 144 очрак теркәлгән, әмма гыйнвар, февраль һәм март айларына якынча 788 очрак туры килгән», — дип белдерде Авдонина.

"2024 елда кызамыкның 232 очрагы теркәлгән. Төп өлеш I кварталда теркәлгән. Җәй көне аерым очраклар булды", - дип хәбәр итте ведомство җитәкчесе урынбасары. Көзен башка илләрдән кешеләр кайту белән авырулар үсеше шулай ук мөмкин, дип өстәде Авдонина.

Май ае ахырында хәбәр ителгәнчә, Татарстанда 2024 ел башыннан 893 кеше коклюш белән авырый башлаган, ә 2023 елның шул ук чорында-18 кеше. Бер ел эчендә үсеш — 50 тапкырга диярлек тәшкил иткән. Быел июль аенда коклюш инфекциясе белән авыручылар саны ел башы белән чагыштырганда 7 тапкырга кимегән. 

Шулай ук республикада быел кызамык белән авыручылар саны кискен артты. Июль ахырында Авдонина әйткәнчә, 2024 ел башыннан кызамыкның 217 очрагы ачыкланган, бу узган елның шул ук чоры белән чагыштырганда 2,5 тапкырга күбрәк. Авыруның таралуының төп сәбәбе-прививкалардан баш тарту, дип өстәде ул.