Татарстанда миллионер хатын ирен карау өчен няня эзли

Ул популяр реклама сайтына эленгән, дип яза НТР - 24 телеканалы сайты. 

— Мин миллионерша, биюти-укытучы. 48 яшьлек ирем өчен няня эзлим, атнага 5 тапкыр өйгә килергә кирәк. Эш көннәрендә 8дән 20гә кадәр (бәлки сәгатьләр һәм көннәр артыр да) эшләү таләп ителә, — диелә белдерү текстында.
Няняның вазифаларына - ир белән бергәләп приставкада уйнау һәм хоккей карау, төшке аш йокысын оештыру, тәүлегенә 2 тапкыр пилмән ясау керә.
Шулай ук әлеге хезмәткәр Михаил Круг һәм «Вороваек» җырларын, Вовочка турында анекдотларны, хоккей жаргонын һәм xBox уеннарын белергә тиеш.
12 сәгатьлек эш көнендә аена 100-150 мең сум акча түләргә вәгъдә итәләр.