Татарстанда тарифлар кыйммәтләнү буенча кая зарланырга була?

Гыйнварда Татарстанда яшәүчеләр декабрь өчен торак-коммуналь хезмәтләр өчен түләүләрне уртача 9 процентка индексацияләнгән тарифлар белән алды. 

"Быел индексация барлык субъектлар өчен дә бер үк һәм 9 процент тәшкил итә. Киләсе индексация 2024 елның 1 июленнән генә булачак. Тиешле тарифлар ел ярымнан артык гамәлдә булачак», - дип искәртте ТР Тарифлар буенча Дәүләт комитеты рәисенең беренче урынбасары Лиса Хәбибуллина. Барлык торак-коммуналь хезмәтләр дә сыйфатлы һәм вакытында бирелергә тиеш, алар өчен түләүне дөрес исәпләү дә мөһим, дип билгеләп үтте. Сыйфатка яисә хезмәтләрне вакытында күрсәтмәү фактына шелтәләр булса, кешеләр тиешле ведомстволарга мөрәҗәгать итә алалар.

Әйтик, энергетика хезмәтләре-электр һәм газ турында сүз бара икән, Татарстан сәнәгать һәм сәүдә министрлыгына, коммуналь өлкә – җылылык, су, канализация буенча - Татарстан төзелеш министрлыгына, ә исәпләүләр буенча Дәүләт торак инспекциясенә мөрәҗәгать итәргә кирәк. Шулай ук исәпләүләр мәсьәләләре буенча ТР Тарифлар буенча Дәүләт комитетына 236-36-36 кайнар линия телефоны буенча мөрәҗәгать итәргә мөмкин. Әгәр дә сорау тариф чишелешләренә кагылмый икән, белгечләр мөрәҗәгатьне объектив аңлату өчен кирәкле ведомствога җибәрәчәкләр. Моннан тыш, татарстанлылар торак-коммуналь хезмәтләр өчен түләгәндә ташламалардан файдалана ала.

"Гражданнар өчен гамәлдәге барлык ташламалар һәм социаль ярдәм чаралары сакланган. Әгәр гражданның торак урыны һәм коммуналь хезмәт күрсәтүләр өчен түләүгә чыгымнары гаиләнең җыелма кеременнән 21% тан артып китсә, субсидия сорап социаль яклауга мөрәҗәгать итәргә кирәк», – дип искәртте Хәбибуллина.

Шулай ук авыл җирлегендә электр энергиясе өчен түләү буенча ташламалы коэффициент, электр энергиясе челтәрләренә техник тоташу буенча ташламалы ставкалар, газ тарату челтәрләренә бушлай тоташу мөмкин булган. Моннан тыш, узган елдан электр энергиясен исәпләү приборлары бушлай урнаштырыла.

ТР Министрлар Кабинетында узган бүгенге киңәшмәдә Татарстан Президенты Рөстәм Миңнеханов татарстанлыларның ТКХ өчен түләүләрнең дөреслеген тикшерергә кушты. Ул халыкка түләүләрнең үсү сәбәпләрен, шулай ук республикада гамәлдә булган социаль ярдәм чараларын аңлатуның мөһимлеген билгеләп үтте.