Татарстандагы гарасат нәтиҗәләре тиз арада хәл ителәчәк

Кичә, 1 июньдә, кич белән Чирмешән районы Гадәттән тыш хәлләрне булдырмый калу, нәтиҗәләрен хәл итү һәм янгын куркынычсызлыгын тәэмин итү комиссиясе утырышы уздырылды. Анда табигать китереп чыгарган фаҗиганең нәтиҗәләрен хәл итү мәсьәләләре каралды, дип хәбәр иткән "Татар-информ" мәгълүмат агентлыгына ПСЧ-135 эчке хезмәте капитаны Фәрит Яруллин.

"Гадәттән тыш хәлләрне булдырмый калу һәм нәтиҗәләрен хәл итү буенча һәм янгын куркынычсызлыгын тәэмин итү комиссиясе утырышында электр, газ һәм коммуналь хезмәт өлкәсе хезмәткәрләре белән гарасат нәтиҗәләрен тиз арада хәл итү бурычын куйдык", - дип билгеләп үтте Яруллин.

Исегезгә төшерәбез, кичә Татарстанда көчле җил йорт түбәләрен кубарды, агачларны сындырды, дип хәбәр иткән идек.

Яруллинның сүзләренчә, хәзер белгечләр алдында табигать бәла-казасы район халкы милкенә салган зыянның күләмен исәпләп чыгару бурычы тора.