Татарстанның бер авылында чебиләр үлеп беткән

Балтач районының бер авылында бройлер чебиләр үлә дигән хәбәр яшен тизлегедәй таралды, дип яза районның "Хезмәт" газетасы. Тизәкләре дә канлы ди. Сатучы да кире акчаларын өләшергә мәҗбүр булган. Кош гриппы дигән куркыныч хәбәр таралганда мондый хәл авыл халкын нык шикләндергән. Алай ук микән, Лаеш кошчылык фабрикасы дөрләп яна торды, авыл кешесе кырылып чеби ала торды. Чеби сатучыларның берсенең дә сату үтми дип зарланганы ишетелмәде.

- Бу хәбәрне без дә ишеттек, - ди чеби сатучыларның берсе. - Чуаш чебиләрен алырга кирәк, ул якларда мондый афәт юк.

Ветхезмәткәрләрдән алынган мәгълүмат буенча, чебиләр эчәкләренә салкын тигәнлектән дә канлы тизәк чыгара икән. Чебешләрне ныгытып җибәрү өчен әрем суы белән әче су әйбәт, диләр алар, диелгән район хәбәрендә.