Укучыларның татар теленнән белемнәрен тикшерәләр

Мәктәпләрдә тиздән "урак өсте" башланачак. Укучылар БДИларга әзерләнә. Өстәмә дәресләр ала, репетиторлар белән шөгыльләнә. 9 сыйныф укучылары исә инде бүген татар теленнән белемнәрен сыный. Алар татар теленнән бердәм республика тесты тапшыра. Әлеге максатларда Татарстанда 133 сынау пункты оештырылган.

Күнегү, биремнәрне укучылар 2,5 сәгать вакыт эчендә чишәргә тиеш. Башкарылган эшләрне мәгълүмат эшкәртү җирле үзәгендә тикшерәчәкләр. Тест нәтиҗәләре буенча, барлык укучыларга да махсус сертификат бирелә. Сүз уңаеннан, татар теле фәненнән БДИ бирү мөмкинлеге дә бар.