Узган ел Татарстан буенча Социаль фонд бүлеге үлгән татарстанлыларның 2,5 мең варисына пенсия тупланмаларын күчергән. Гомуми сумма 122,8 миллион сумнан артык тәшкил иткән.
Тупланма пенсия 1967 елгы гражданнардан башлап формалаша. Кешенең 2002 елдан 2013 елга кадәр рәсми кереме булуы мөһим. Пенсия тупланмалары 1953-1966 елгы ир-атларда һәм 1957-1966 елгы хатын-кызларда да булырга мөмкин — әгәр эш бирүче алар өчен 2002 елдан 2004 елга кадәр тупланма пенсиягә иминият взносын күчергән икән. Моннан тыш, мондый тупланма ана капиталын тупланма пенсия формалаштыруга юнәлткән хатын-кызларда яки дәүләт тарафыннан пенсия тупланмаларын финанслау программасында ирекле рәвештә катнашкан 1967 елга кадәр туган гражданнарда булырга мөмкин.
Үлгән туганнарының пенсия тупланмаларын, аның үлеме хезмәт пенсиясенең тупланма өлеше билгеләнгәнче яки әлеге пенсиянең күләмен яңадан исәпләгәнче, варислар алырга мөмкин. Бу очракта өстәмә пенсия тупланмалары исәпкә алына.
- Түләү Пенсия фонды аша яки дәүләтнеке булмаган пенсия фонды аша башкарылачак. Мәрхүм булган кешенең пенсиясенең тупланма өлеше кайда формалашуга бәйле бу, - ди Татарстан Социаль фонды җитәкчесе Эдуард Вафин.
Татарстан Социаль фонды белгечләре аңлатканча, мәрхүм булган очракта аның варисы дип алдан билгеләнгән кеше булса, шул тупланма өлешне алырга мөмкин. Әгәр мондый очракта гариза юк икән, әлеге хокукка туганнары да ия була, ди белгечләр. Беренче чиратта – балалар, шулай ук уллыкка яки кызлыкка алынганнар да, тормыш иптәше, әти-әниләр хокуклы. Аннары абыйлар-апалар, сеңелләр, әби-бабайлар, оныклар.
Туган тиешле кеше үлгәч, алты ай эчендә Пенсия фондына гариза белән мөрәҗәгать итәргә. Әгәр вакыт үтеп китсә, ул суд тәртибендә расланачак, торгызылачак.
Комментарийлар