Вакансияләр җитәрлек. Эш юк дип, зарланма

«Хәзерге вакытта Татарстанда хезмәт базарындагы вазгыять тотрыклы. Без халыкның мәшгульлеге шактый югары — 62 проценттан артык булуын күрәбез. Бу күрсәткеч ил буенча 59 процентны тәшкил итә. Ә Идел буе федераль округы буенча 59 проценттан аз гына артык. Шул ук вакытта Татарстанда эшсезлек дәрәҗәсе түбән», — диде «Татар-информ» корреспондентына ТР Хезмәт, мәшгульлек һәм социаль яклау министры Эльмира Зарипова.

Республиканың мәшгульлек үзәкләрендә 10 меңнән артык кеше рәсми рәвештә теркәлгән. Шул ук вакытта мәгълүматлар базасында 42,6 мең вакансия турында мәгълүмат бар. «Гамәлдә без бер эшсезгә дүрт вакансия тәкъдим итә алабыз», — дип билгеләп үтте Зарипова.

Эшсезләр арасында 70 проценттан артыгы үз теләкләре белән эштән киткән гражданнар. Бүгенге көндә төбәктә эш эзләүнең уртача вакыты 3тән алып 4 айга кадәр тәшкил итә.

Чыганак: Татар-информ