«Яңа Гасыр» зур гаиләләрне халыкка танытырга җыена

- Каналыбызның унбишеллыгын менә шундый зур проект белән билгеләп үтәсебез килде. Беренчедән, моның белән күп балалы гаиләләргә зур игътибар юнәлтәбез. Икенчедән, шушы өлкәдә дәүләт дәрәҗәсендә нинди законнар кабул ителгән һәм алар ничек эшли - шул турыда күбрәк күрсәтәчәкбез, - диде журналистлар белән очрашу вакытында "Татарстан - Яңа Гасыр" телеканалы җитәкчесе урынбасары Мәдинә Тимерҗанова.

Җитәкче әйтүенчә, "Яңа Гасыр" теленакалының тулы иҗади төркеме, иртәнге тапшырулардан башлап "Трибуна Нового Века - Трибуна депутата" һәм "Таяну ноктасы" программалары белән тәмамлап, рус һәм татар телләрендәге тапшыруларда зур гаилә төшенчәсенең мәгънәсен ачу өстендә эшләячәкләр. Роликлар "Бәхетемнең иң олысы" һәм "Счастье - в большинстве" шигарьләре белән тәмамлана. Проект исә үзе октябрь башында зур ток-шоу белән төгәлләнер дип уйланыла. Гомумән алганда, мондый тапшыруларда унсигез гаилә катнашыр дип планлаштырыла. Алар арасында тугыз балалы гаиләдә тәрбияләнгән Татарстанның Беренче Президенты, Татарстанның Дәүләт Киңәшчесе Минтимер Шәймиев тә бар.

- Үз балалары бишәү булып, мөмкинлеге чикләнгән тагын дүрт баланы гаиләгә алган кешеләр минем өчен Герой. Моның өчен зур йөрәкле булырга кирәк. Гомумән, һәр нормаль кешенең күңелендә күп балалы әти яки әни яшидер, дип уйлыйм. Тормыш шартлары, һәртөрле мәшәкатьләр миңа да үз вакытында күп балалы әти булырга мөмкинлек бирмәде. Бәлки, шушы күп аспектлы социаль проект белән күңелнең бер почмагында "йоклаучы" күпбалалыкны уятырбыз, кешеләрнең тормышка карашларын бераз гына үзгәртә алырбыз. Әмма бар да ал да гөл, дип күрсәтүне максат итеп куймыйбыз. Күпбалалы гаиләләрдә проблемалар бик күп: cоциаль, финанс мәсьәләләре, медицина ярдәме күрсәтү, торак - барысын да күрсәтәчәкбез, - диде "Татарстан-Яңа Гасыр" җитәкчесе Илшат Әминов.

Тапшырулардан тыш, әлеге проект барышында "Путешествие большой семьи. Выходной день с ТНВ" акциясе дә уздырыла. Ягъни күпбалалы гаилә бер көнен (шимбәне) "Яңа Гасыр" белән үткәрә: телеканал үз өстенә күпбалалы гаиләләрнең республика төп туристлык маршрутына, шулай ук популяр балалар күңел ачу урыннарына - аквапарк, зоопарк һәм башка кызыклы җирләргә сәяхәт итәчәк.

Моннан кала, "Счастье - в большинстве" темасына багышланган балалар конкурсы уздырыла. Аның җиңүчеләрен тамашачылар телеканалның рәсми сайтында интерактив тавыш бирү аша ачыклаячаклар. Иң яхшы өч эшнең авторы "Яңа Гасыр" телерадиокомпаниясеннән махсус бүләккә ия булачак.

Сүз уңаеннан:

Татарстанда 31 122 күп балалы гаилә исәпләнелә. Шуларның 18 217 се - шәһәрдә, 12 905е авылларда яши.

Республикада унике һәм унбер балалы берешәр гаилә, ун балалы - биш гаилә, һәм тугыз балалы - ун гаилә. Ә өч балалы 27 431 гаилә.