Япон яшьләре татарлар турында китап чыгарган

Китап авторларының берсе булган Ютоның әйтүенчә, әлеге китап басылып чыккан һәм ул укучыларда кызыксыну тудырган.

– Ни гаҗәп: китабыбыз яхшы сатыла. Аны әзерләгәндә, хезмәтебез артык зур кызыксыну уятмас дигән шик тә бар иде. Әмма без уебыздан кире кайтмадык. Татар теленә, Татарстанга гашыйк кешеләр буларак, Япониядә татарлар турында киңрәк мәгълүмат таратырга теләдек. Бездә Татарстан турында бер генә китап та чыкканы булмаган һәм бу эшне беренчеләрдән булып башларга уйладык. Китабыбызны Казан һәм республика районнарын сурәтләгән төсле фотолар белән бизәдек. Татарстанның күренекле урыннары белән таныштырдык. Татарларның мә­дәнияте, тарихы, теле турында да зур мәгълүмат бар. Татарстан белән Япония арасындагы мөнәсәбәтләр хакында да язарга онытмадык, – дип сөйләде безгә Юто Хашияма.

Китапта кечкенә генә японча-русча-татарча сүзлек тә бирелгән.
«Tatarstan Funbook» китабы «Publib» нәш­риятында 1,5 мең тираж белән басылып чык­кан, ул кибетләрдә дә, интернет аша да сатыла. Басманың калган авторлары – шулай ук татар телен өйрәнгән япон яшьләре Акира Сакурама, Мидзуки Накамура. Алар да, Юто кебек үк, татар телен камил белә.

– Татарларны Япониядә таныту эше моның белән генә бетми, «Ак Барс» дигән сайтыбыз да бар. Сайтта шулай ук татарлар турында япон телендә мәгъ­лүматлар урнаштырыла. Татарстандагы яңалыкларны да биреп барыр­га тырышабыз. Порталда берничә сәхифә булдырдык. «Татар ризыклары» дигәнендә татар ризыкларының рецептларын бирәбез. Татар телен өйрәнергә теләүчеләр өчен махсус сайтларга сылтамалар урнаштыр­дык. Сайт­ка керүчеләр шактый, димәк, Япониядә Татарстан турында кызыксыну бар. Без исә ике арада күпер ролен үтибез, – ди Юто.