Йөз елдан соң кабат корылтай

Болар – II Бөтендөнья татар хатын-кызлары съезды делегатлары. Әлегә кадәр гүзәл затларыбыз­ның җыелышлары форум буларак уздырылып килгән, 2017 елда аның бишенчесе узган иде. Менә шушы соңгы форумда киләсе очрашуны съезд формасында үткәрергә кирәк дигән карар да кабул ителде. Әлеге корылтайга татар хатын-кызларының барлык оешмаларыннан да вәкилләр көтелә. «Татар хатын-кызларының I съезды кайчан булган соң?» – диярсез.

Моннан 102 ел элек 1917 елның 24 апрелендә Бөтендөнья мөселман хатын-кызлары – Россия төбәкләре, Кавказ, Кырым, Төркестаннан, Польшадан 90 делегат һәм кунак – Казанга үзләренең I съездларына җыелалар. Анда ирләр белән тигез хокуклылык, балаларны сигез яшьтән укыту һм башка көнүзәк мәсьәләләр карала.
– Ә инде быел апрель урталарында узачак II корылтайда ­Россия Федерациясенең 67 регионыннан, 27 ерак һәм якын чит илләрдән 500 делегат катнашыр дип көтелә. Болардан тыш, махсус чакырылган мәртәбәле кунаклар да булачак, – диделәр оештыручылар түгәрәк өстәлгә җыелган журналистларга.

Ике көнгә сузылган корылтай программасы тыгыз. Делегатларга башта Татар халкының үсеш стратегиясе эскизын тәкъдим итәчәкләр. Аннары алар, төркемнәргә бүленеп, Казан шәһәренең балалар бакчаларында милли тәрбия бирү алымнары белән танышачак. Шул ук көнне Кәрим Тинчурин исемендәге татар дәүләт драма һәм комедия театрында «Татар кызчыгы-2019», «Татар малае-2019» конкурсының йомгаклау өлеше дә булачак.

19 апрель көнне Тукай исемендәге Татар дәүләт филармониясендә съездның пленар утырышы узачак. Филармония фойесында уңган милләттәшләребезнең күңел җылысын саклаган кул эшләреннән күргәзмә дә эшләячәк.
 Катнашучылар өчен мәдәни программа да каралган. Алар Галиәсгар Камал исемендәге татар дәүләт академия театрында Мансур Гыйләҗевнең «Исәнмесез!?.» спектаклен тамаша кылачак. Ә нигә нәкъ шушы тамаша сайлануы билгеле вакытка кадәр делегатларга матур сер булып калачак.

– Әлеге корылтай татар гаиләсенең дәрәҗәсен күтәрергә, милли рухыбызны көчәйтергә булышыр дип ышанабыз, – диде Бөтендөнья Татар конгрессы башкарма комитеты «Ак калфак» татар хатын-кызлары оешмасы рәисе Кадрия Идрисова.
Корылтайның шәрәфле кунаклары һәм тәэсирле мизгелләре турында алдагы саннарыбызда язарбыз әле.