#Кыскача яңалыклар 29 октябрь 2019, 16:34

“Зур этнографик диктант”ны быел 100 мәйданда язачаклар

29 октябрь 2019, 16:34

Татарстанда Халыклар бердәмлеге көне алдыннан, 1 ноябрьдә, "Зур этнографик диктант" Бөтенроссия акциясе узачак. Быел татарстанлылар барлык районнарда 100дән артык мәйданчыкта белемнәрен тикшереп карый алачак.

Скопировать ссылку

Акция Россиянең барлык төбәкләрендә дә оештырыла. Татарстанның Милли музее Казанда чараны үткәрү урыннарыннан берсе булачак. Диктант язуда Россиядә яшәүчеләр һәм рус телен белүче чит ил гражданнары катнаша ала. Аларның белеме, нинди дин тотуы, гражданлыгы һәм яше мөһим түгел.

Диктант биремнәре утыз сораудан тора. Егерме сорау барысы өчен дә уртак булса, унысы федерациянең һәр субъекты өчен уникаль итеп эшләнелгән. Диктантны язу өчен 45 минут вакыт каралган. Барлык биремнәрне үтәгән өчен максималь йөз балл бирелергә мөмкин.

Шулай ук, мәйданчыкларда язарга мөмкинлекләре булмаганнарга "Зур этнографик диктант" сайтында (www.miretno.ru) онлайн-тест узу оештырылачак.

Әлеге киң колачлы акция инде дүртенче ел рәттән үткәрелә. 2017 елда чара халыкара статус алган – акциягә Кыргызстан, Молдова, Таҗикстан һ.б. илләр кушылган.

2017 елда диктантны Россия һәм чит илләрдә оештырылган 2600 мәйданчыкта 367 мең кеше язган булса, узган ел 4567 мәйданда 392 меңләп кеше белемен тикшергән. Татарстанда акциядә 3 меңләп кеше катнашкан.

Чара үтәчәк барлык мәйданчыклар белән диктантның сайтында танышырга мөмкин. Нәтиҗәләр исә 12 декабрьдә игълан ителәчәк.

Лилия Локманова

Кызыклы яңалыкларны күзәтеп бару өчен безнең МАХ каналына кушылыгыз.

#Зур этнографик диктант