2026 елда пенсиягә вакытыннан алда чыгу хокукына кем ия?

Киләсе елда Ерак Төньякта яшәүчеләр пенсиягә вакытыннан алда чыга ала: 25 яшьлек хезмәт стажы булган ир-атлар – 50 яшьтә, 20 стаж булган хатын-кызлар – 45 яшьтә. Чара балыкчыларга, боланчыларга һәм кәсепче аучыларга да кагыла, дип хәбәр итә Россия Хөкүмәте каршындагы Финанс университеты доценты Игорь Балынин. Бу хакта “Парламентская газета” хәбәр итә.

Балынин сүзләренә караганда, әлеге хокук шулай ук кимендә 20 ел урман әзерләүдә эшләгән 50 яшьлек россияле хатын-кызлар өчен, пенитенциар учреждениеләрдә эшләүчеләр яки пассажир транспорты йөртүчеләр өчен дә каралган. Ир-атларга, үз чиратында, 55 яшькә җитәргә һәм 25 еллык стажга ия булырга кирәк.
«Моннан тыш, вакытыннан алда чыгу җир асты эшләрендә, зарарлы хезмәт шартлары булган авыр эшләрдә һәм кайнар цехларда эшләүчеләр өчен каралган: ир-атлар өчен кимендә ун ел һәм хатын-кызлар өчен җиде ел ярым эшләгән булу мөһим һәм иминият стажы кимендә 20 ел һәм 15 ел булган очракта” дип сөйләгән «Газета.Ru»га икътисади фәннәр кандидаты.

Аерым кагыйдәләр кайбер "авыр" һәм социаль әһәмияткә ия һөнәрләр өчен дә гамәлдә. Аерым алганда, пенсияне 15 еллык стажы булган 50 яшьлек аграр тармакта тракторчы-машинист булган яки юл һәм төзелеш машиналарын йөрткән хатын-кызлар рәсмиләштерә ала. Шулай ук, ким дигәндә, 20 елга иминият стажы булу шарт, дип ачыклык кертә Балынин.

Вакытыннан алда иминият пенсиясен күп балалы аналарга да билгеләргә мөмкиннәр: биш һәм аннан да күбрәк бала булганда – 50 яшьлекләргә, дүрт бала булганда –  56 яшьлекләргә, өч балага кадәр булганда 57 яшьлекләргә. Балаларны сигез яшькә җиткәнче тәрбияләргә кирәк. Тиешле хокукны гамәлгә ашыру өчен россиялеләргә ким дигәндә 30 индивидуаль пенсия коэффициентын тупларга кирәк, дип өсти белгеч.

Дилбәр Гарифуллина әзерләде