2026 елда Татарстанда 4,3 миллион тонна ашлык җыеп алырга планлаштыралар

Татарстанда 2026 елда авыл хуҗалыгында үсеш 1,5% дәрәҗәсендә планлаштырыла, шул исәптән азык-төлек продуктлары җитештерү ким дигәндә 2,6% ка үсәргә тиеш. Мондый мәгълүматлар бүген Татарстан Республикасы Хөкүмәте Йортында узган киңәшмәдә республиканың авыл хуҗалыгы һәм азык-төлек министры Марат Җәббаров тарафыннан җиткерелде. Ведомство башлыгы сүзләрен ТР Хөкүмәтенең рәсми порталы китерә.

Быел уңай һава шартларында Татарстанда 4,3 млн.тонна ашлык, 2,3 млн. тонна шикәр чөгендере һәм 280 мең тонна бәрәңге җыеп алырга планлаштыралар. Шулай ук кимендә 1 млн тонна май орлыгы җыеп алу һәм шартлыча бер баш терлеккә 35шәр центнер тупас һәм сусыл азык әзерләү планлаштырыла.

Мелиорацияне үстерү тармакның өстенлекле юнәлешләренең берсе булып калачак, шул ук вакытта Татарстанның Авыл хуҗалыгы һәм азык-төлек министрлыгы һәм республика дәүләт ярдәме чараларын, ташламалы лизинг программаларын да кертеп, актив кулланачак.

Җәббаров шулай ук Россия Президенты Указы нигезендә терлекчелек буенча максатчан күрсәткечләр билгеләнүен искәртте. Сөт, ит, йомырка җитештерү, терлек һәм кош-корт саны буенча планнарга ирешүдә төбәкнең азык-төлек иминлеген тәэмин итүче кече хуҗалыклар мөһим роль уйный.

Моннан тыш, республика «авыл территорияләрен комплекслы үстерү» программасында һәм «АПКда кадрлар» федераль проектында катнашуын дәвам итә, ул 2026 елда да гамәлгә ашырылачак.