30 килограммга ябыккан: Татарстанда 44 яшьлек ир-атны коткарганнар

Казанда яшәүче 44 яшьлек кешенең эче авырта башлаган. Моңарчы ир-ат онкологик авыруны җиңгән булган, шуңа күрә бу юлы шунда ук тикшеренә башлаган. Хастаханәләрнең берсендә сукыр эчәгесен алу буенча операция үткәргәннәр.

Әмма ир-атның хәле начарайганнан-начарая барган. Ниндидер мизгелдә ул ашаудан калган, хәлсезлектән интеккән. Каты ризык үзләштерелми башлаган, тыны кысылган һәм тиз арыган.

17 сентябрьдә ир-ат РКБга мөрәҗәгать иткән. Башта табиблар аңарда панкреатит түгелме икән дип шикләнгәннәр, тик тикшерү барышында сәбәп эчәкләрдә кан әйләнеше начар булуга бәйле икәнлеген ачыклаган, холестерин төерчекләре эчәктәге артерияне каплаган. Гадәттә мондый очракларда хирурглар рентген контроле астында артериягә стент куялар. Артерия бөтенләй ябылганлыктан, хирурглар аңа үтә алмаган. 

Ир-атны кан тамырлары бүлегенә күчергәннәр, анда хирурглар артерияне протезлауга алынганнар. Бүлек мөдире Рифкать Нуретдинов һәм кан тамырлары хирургы Михаил Андреев авыруның аортасыннан зыян килгән артериясенә кадәр полимер протез тегеп, ябык артериядә кан әйләнешен торгызган. 

Икенче тәүлеккә ир-ат инде ашый башлаган. Хәзер аңа тернәкләнергә, тән массасын җыярга һәм яшәү урыны буенча табибларда күзәтүдә торырга кирәк.