Татарстан бюджеты проекты парламент тыңлауларында каралды

Дәүләт Советы Рәисе Фәрид Абдулганиев билгеләп үткәнчә, бюджет проекты киеренке, әмма баланслы итеп формалаштырылган. Аның сүзләренчә, төп финанс документы Татарстанның стратегик үсеш максатларын гамәлгә ашыру, икътисадка һәм кеше капиталына инвестицияләр кертү өчен инструмент булып тора.

2027 елда Татарстанның тулай төбәк продукты үсеше 101 процент дәрәҗәсендә фаразлана. Сәнәгать җитештерүе индексы 100,5 процент, авыл хуҗалыгы продукциясе җитештерү 101,5 процент булыр дип көтелә. Реаль хезмәт хакын 2,4 процентка арттыру планлаштырыла.

Бюджет чыгымнарында социаль өлкә төп өстенлекләрнең берсе булып кала. 2027 елда мәгарифкә берләштерелгән бюджеттан 216 млрд сум, республика бюджетыннан 123 млрд сум юнәлтү каралган.

Татарстан Премьер-министры Алексей Песошин хәбәр иткәнчә, 2027 ел бюджеты дефициты 8,5 млрд сум күләмендә фаразлана. Республика җитәкчелеге салым базасын киңәйтү һәм чыгымнарны оптимальләштерү исәбенә дефицитны каплау бурычын куя.

Бюджет проекты алга таба Дәүләт Советының профильле комитетлары утырышларында җентекләп каралачак.