350 укытучы торак арендасы өчен компенсация алачак

Татарстан Республикасы Министрлар Кабинетының 21.03.2026 №250 карары белән әлеге максатларга елына 180 мең сумнан да артык булмаган күләмдә түләү билгеләнгән. Компенсация конкурс нигезендә 350 алучыга биреләчәк. 

2026 елга Татарстан Республикасы бюджетында әлеге максатларга 63,0 млн. сум каралган.

Программаның максаты – педагогларны мәктәпләргә җәлеп итү һәм урыннарда саклап калу. Бүлеп бирелә торган акчалар ярдәмендә хезмәткәрләр тугыз айга кадәрге чорда аренда чыгымнарын каплый алачак. Акча алу өчен педагогка аренда килешүе төзергә, эшләгән җирлегендә үз торагына ия булмаска һәм башка шундый ук ярдәм чаралары алмаска тиеш. 

Дәгъвачыларны сайлап алу ике этапта узачак: башта педагогның соңгы өч елдагы һөнәри казанышларына бәя бирәчәкләр, ә аннары аның белән һөнәри-психологик әңгәмә уздырылачак. Иң күп балл җыючылар җиңәчәк. Аннары хезмәткәрләр белән килешү төзиячәкләр, ә компенсацияне арендага түләүне раслый торган документлар тапшырылганнан соң банктагы счетка күчерәчәкләр. 

Шул ук вакытта, документ нигезендә, түләү алучылар Татарстан мәгариф оешмасында ким дигәндә бер ел эшләргә тиеш. Әгәр кеше, мәсәлән, вакытыннан алда эштән китсә, ул компенсация алу өчен шартларны бозачак.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.