Акрын йөрү, егылу, хәтер начарлану: картаюның беренче билгеләрен атадылар

Кеше элеккегә караганда акрынрак йөри башласа, еш егылса яки хәтере начарайса, моны гади картлык билгесе дип кенә кабул итәргә ярамый. Мондый үзгәрешләр организмның картаюы белән бәйле булырга мөмкин һәм табибка мөрәҗәгать итүне таләп итә.

Бу хакта РИА Новости агентлыгына Пирогов университетының Россия геронтология фәнни-клиник үзәге директоры, Россия геронтологлар һәм гериатрлар ассоциациясе президенты Ольга Ткачева сөйләгән.

Белгеч сүзләренчә, аеруча түбәндәге үзгәрешләргә игътибар итәргә кирәк:

• йөрешнең акрынаюы һәм ышанычсызлануы;

• еш егылу;

• тән авырлыгының кимүе;

• хәтернең начарлануы;

• күрү һәм ишетү сәләтенең түбәнләве.

Авыруны көтмичә, куркынычны алдан ачыкларга кирәк

Ольга Ткачева диспансеризациянең мөһимлеген дә искәрткән. Ул хроник авыруларның куркыныч факторларын ачыкларга, чирләрне башлангыч чорында табарга һәм вакытында профилактика яки дәвалау чараларын күрергә ярдәм итә.

Ә илнең төрле төбәкләрендә булдырыла торган сәламәт озын гомер үзәкләре тагын да иртәрәк этапта – авыру әле барлыкка килмәгән, әмма организмда тискәре үзгәрешләр башланган чорда эшли.

Белгеч аңлатуынча, мондый үзәкләр яшь белән бәйле авыруларның килеп чыгу куркынычын арттыручы факторларны алдан ачыкларга һәм аларны төзәтергә ярдәм итә. Бу чирләрне кисәтү белән беррәттән, кешенең картаю барышына да уңай йогынты ясарга мөмкин.