Әлеге юл хәрәкәте кагыйдәләрен бозган өчен штрафларга 25 процент ташлама каралмаган

Әмма бу кагыйдә барлык хокук бозуларга да кагылмый, дип искәртә Эчке эшләр министрлыгы.

Ташлама җитди һәм кабат кылынган хокук бозулар өчен гамәлдә түгел. Алар арасында:

* исерек килеш транспорт чарасы белән идарә итү;

* медицина тикшерүен узудан баш тарту;

* машина йөртү таныклыгыннан мәхрүм ителгән килеш руль артына утыру;

* тимер юл кичүендә кагыйдә бозу;

* кабат теркәлмәгән автомобиль белән идарә итү;

* тизлекне 40км/сәгатькә һәм аннан да күбрәккә арттыру;

* кабат каршы як хәрәкәт юлына чыгу.

Моннан тыш, балаларны автобусларда оешкан рәвештә йөртү кагыйдәләрен бозган, юл-транспорт һәлакәте урынындагы хокук бозуларга юл куйган, шулай ук авариядән соң алкоголь кулланган машина йөртүчеләргә дә штрафны тулы күләмдә 100 процент түләргә туры киләчәк.

Эчке эшләр министрлыгында искәртүләренчә, кабат хокук бозу дип, элекке җәза турында карар үз көченә кергән көннән алып бер ел эчендә шул ук төрдәге кагыйдә бозу санала.