43 ил вәкилләрен берләштергән фестиваль: Казанда Көнчыгыш мәдәнияте бәйрәме узачак

Чара офлайн һәм онлайн форматларда үткәрелә. Фестиваль инде өч ел рәттән ЮНЕСКО эгидасы астында уза.

«Фестивальдә халыкара катнашу елдан-ел киңәя. Казахстан, Үзбәкстан, Төркмәнстан, Кыргызстан, Мисыр, Согуд Гарәбстаны, Оман, Кытай, Һиндстан кебек даими катнашучыларыбызга быел Нигерия һәм Эфиопия артистлары да кушыла. АСЕАН илләре вәкилләре арасында беренче тапкыр Бруней чыгыш ясаячак. Үзенчәлекле мәдәнияте белән Алжир төркеме дә фестивальдә беренче тапкыр катнашачак», — дип белдерде фестивальнең генераль продюсеры Рифат Фәттахов.

Быел Франция дә фестиваль белән кызыксынуын белдергән. Рифат Фәттахов сүзләренчә, чарада ЛНР вәкилләре дә катнашачак. Соңгы биш елда проектта Россиянең 22 төбәгеннән һәм 43 илдән вәкилләр чыгыш ясаган.

Фестивальнең оештыру комитеты рәисе - РФ мәдәният министры урынбасары Андрей Малышев, ә аның урынбасары - ТР вице-премьеры Ләйлә Фазлыева. Ачылыш тантанасы 9 ноябрьгә планлаштырылган.

Быелгы программада яңалыклар да бар. Алар арасында «Студентлар Көнчыгыш базары» һәм яшьләр өчен Көнчыгыш вечеринкасы каралган.

Шулай ук яшь башкаручылар конкурсы узачак. Анда «Дагестан» дәүләт җыр һәм бию ансамбле, Калмыкиянең «Ойраты» дәүләт бию театры, Чечнядән «Башлам» ансамбле катнашачак.