Россиядә дроннар... ризык ташый башлый

Проектны Түбән Новгородта сыный да башлаганнар инде. Бу хакта «Ведомости» газетасы яза. Дрон азык-төлекне әлегә өйгә хәтле китерми, аерым билгеләнгән постаматларда калдыра. Һәр очышны оператор күзәтеп бара. Заказның гомуми авырлыгы 5 килограммнан артмаска тиеш, димәк, дрон бер очышта 5 литрлы су шешәсен алып килә ала дигән сүз.

Оча торган курьерның заказны китерүен кимендә 30 минут көтәргә кирәк, дип аңлаткан дроннарны ясаучы-оператор «Клеверкоптер». Постаматта заказ 3 сәгать саклана. Кулланучыга белдерү белән бергә постаматны ачу өчен код та килә.

Беренче оча торган курьерлар Россиядә 2014 елда ук барлыкка килгән. «Infoline-аналитика» мәгълүматы буенча, дроннарны пицца, маркетплейс заказлары, шулай ук почтаны таратуда кулланып караганнары бар.