“Алтын каләм” - яшьләрдә яңа мөмкинлекләр ачучы проект

Проект “Татмедиа” мәгълумат агентлыгы, Татарстан Республикасы Яшьләр эшләре министрлыгы, “Россия яшьләр берлеге”, Татарстан Республикасы Журналистлар берлеге тарафыннан гамәлгә ашырыла. Быел ул 30 тапкыр уздырыла.

Фестивальнең башлану тарихы турында танылган журналист һәм дәүләт эшлеклесе Римма Ратникова уртаклашты. Беренче фестивальне ничек  оештыруларын искә төшереп, конкурсның төп бүләге – алтын каләмнең сәяхәт башланырга бер көн кала исләренә төшүен һәм бу эштә аларга рәссам ире ярдәм  итүен әйтте. Яшь каләмчеләргә бүләкне өлгертер өчен рәссәмнәр төн буе махсус пыяладан каләм кисеп, аны алтыннан йөгертәләр. “Теплоход китәр мизгелләрен белдереп кычкыртып куйды, нәкъ шул минутта төп бүләкләрне – каләмнәрне китереп өлгерделәр. Шулай итеп без җиңүчеләргә алтын сынны тантаналы шартларда тапшыра алдык”, – дип сөйләде Римма Ратникова.

Быел 1 - 5 июль көннәрендә узучы проект 30 ел дәвамында йөзләгән яшь журналистлар өчен медиамәйдәнга чыгу өчен юл ачты.  Әлеге фестивальдә 14 яшьтән 24 яшькә кадәр булган яшьләр катнаша. Алар үзләрен рус һәм татар телләрендә телевидение һәм видеоблогинг, подкаст һәм радио, дизайн һәм верстка, реклама һәм җәмәгатьчелек белән элемтәләр урнаштыруда сынап карый. Оештыручылар әйтүенчә, татар телендә чыгып килүче язма журналистика белән кызыксынучылар саны шактый күп булуы сөенеч тудыра. Моннан тыш, кайбер районнар әлеге фестивальгә шактый тәҗрибә туплап килә. Мисалга, ел саен Арча районыннан әзерлекле балалар килеп, фестивальнең мәртәбәле исемнәренә лаек булалар.

“Бүләкләгән вакытта географиягә игътибар бирергә тырышсак та, әзерлекле балаларны күреп, аларга өстенлек бирми мөмкин түгел. Бу эшләр артында күпме хезмәт салынган”, – ди Римма Ратникова. Һәм ул үз чиратында җирлекләрдә яшь каләмчеләр белән ныклы эш алып барырга кирәген белдерде.