Апрельдә кая барырга? Туристлар сайлаган иң популяр юнәлешләр билгеле булды

Белгечләр әйтүенчә, быел яз уртасында туристлар иң еш сайлаган юнәлешләр арасында Санкт-Петербург, Калининград, шулай ук чит илләрдән — Минск, Истанбул һәм Тбилиси лидерлык итә. Бу хакта РИА Новости яза. 

Tripster сервисы мәгълүматлары буенча, Россия эчендә популяр бишлеккә шулай ук Мәскәү, Мурманск һәм Кисловодск та кергән. Ә чит ил маршрутлары арасында Ереван һәм Пекинга кызыксыну арта бара.

Аеруча Пекин быелгы язның “йолдызлы” юнәлешләреннән берсенә әверелгән. Моңа виза режимының гадиләшүе һәм очышлар саны арту сәбәпче. Туристлар Кытайда Пекиннан тыш Шанхай, Гуанчжоу, Чэнду һәм хәтта “Аватар таулары” белән танылган Чжанцзяцзе якларына да сәяхәт итә.

Якын Көнчыгыштагы киеренке хәлләр фонында БДБ илләренә сәяхәтләр дә популярлаша. Мәсәлән, Минскига кыска — 3-4 көнлек сәфәрләр ешрак сайлана. Ә Ереван туристларны уңайлы авиарейслар, тел киртәсе булмау һәм милли кухнясы белән җәлеп итә.

Грузиянең башкаласы Тбилиси исә кунакларны Иске шәһәр урамнары, күкерт мунчалары һәм базарлары белән үзенә тарта.

Россия эчендә исә яз көне туристлар күбрәк тарихи һәм архитектурасы бай шәһәрләргә өстенлек бирә. Санкт-Петербург һәм Мәскәүдә экскурсияләр, тарихи үзәк буйлап йөрүләр аеруча популяр.

Моннан тыш, сәяхәтчеләр табигать уянуын тоярга мөмкин булган урыннарны да сайлый. Балтыйк буе шәһәрләре — Светлогорск, Янтарный һәм Курш косасы — язны иртәрәк каршы алуы белән җәлеп итә.

Кисловодскта бу чорда һава температурасы +18 градуска кадәр күтәрелә, шуңа күрә туристлар анда паркларда йөрергә һәм табигать кочагында ял итәргә бара.

Төньяк юнәлешләр дә игътибардан читтә калмый: Мурманскида апрельдә әле кышкы күренешләр саклана, әмма салкыннар йомшара. Туристлар анда төньяк балкышын күрергә, тау чаңгысы сезонын ябып калырга һәм Арктика атмосферасын тоярга омтыла.

Шулай итеп, апрель — сәяхәт өчен иң уңайлы айларның берсе: шәһәр экскурсияләре дә, табигать кочагындагы ял да бердәй популяр.

Билгеле булганча, Татарстанда «Туризм һәм кунакчыллык» илкүләм проекты гамәлгә ашырыла.