#Кыскача яңалыклар 02 март 2026, 11:00

Бәяләр үсә, керемнәр җитми: 2026 елга Татарстан нинди бурычлар куя?

02 март 2026, 11:00

2026 елга Татарстанда өстенлекле юнәлешләр исемлегенә торак-коммуналь хуҗалык (ТКХ) өлкәсенең торышын яхшырту кертелде.

Скопировать ссылку

Шулай ук бәяләр һәм тарифлар үсешен тоткарлау, халыкның керемнәрен арттыру да төп бурычлар рәтендә.

Республика Министрлар Кабинетының тиешле карар проекты хәзер коррупциягә каршы экспертиза уза. Документта китерелгән социологик сораштыру нәтиҗәләренә караганда, республикада яшәүчеләрнең 29,6 проценты ТКХ өлкәсен мөһим өстенлекләрнең берсе дип саный.

Респондентлар аеруча түбәндәге проблемаларны билгеләп үткән: коммуналь хезмәт күрсәтүче оешмаларда белгечләр җитмәү; хезмәткәрләрнең һөнәри әзерлек дәрәҗәсе түбән булу; дератизация һәм дезинсекция эшләренең канәгатьләнерлек башкарылмавы.

Шунысы игътибарга лаек: 2025 елда халык тарафыннан билгеләнгән өстенлекләр исемлегендә ТКХ юнәлеше булмаган. Ул чакта беренче планга алкоголизм һәм наркомания белән көрәш чыккан, аны сораштырылучыларның 27,4 проценты мөһим дип атаган.

Узган ел белән чагыштырганда, быел ике өстенлек сакланып калган. Беренче урында — бәяләр һәм тарифлар үсешен тоткарлау. Бу юнәлешне республика халкының 61,6 проценты мөһим дип саный (2025 елда – 60,2 процент). Социологик мәгълүматлар күрсәткәнчә, гаилә бюджетына төп йөкләнеш элеккечә үк азык-төлек һәм торак-коммуналь хезмәтләргә туры килә. Икенче урында — халыкның керемнәрен һәм социаль ярдәм дәрәҗәсен арттыру.

Быел бу мәсьәләне респондентларның 31 проценты әһәмиятле дип атаган (узган ел – 33,3 процент). Шул ук вакытта сораштыруда катнашучыларның күпчелеге акча җыю мөмкинлеге булмавын билгеләгән, ә яртысыннан артыгы гамәлдәге социаль ярдәм чараларын җитәрлек түгел дип бәяләгән. Исегезгә төшерәбез: узган елның июленнән торак-коммуналь хезмәтләргә тарифлар 11,9 процентка артты, бу рәсми инфляция күрсәткеченнән (5,6 процент) ике тапкырга диярлек югарырак.

Моннан тыш, 2026 елның 1 гыйнварыннан ил буенча ТКХ тарифлары уртача 1,7 процентка индексацияләнде. 1 октябрьдән Татарстанда тарифларның тагын да сизелерлек үсүе көтелә — муниципалитетка карап, 13,4 процентка яки 18,2 процентка кадәр.

Билгеле булганча, «Яшәү өчен инфраструктура» илкүләм проекты гамәлгә ашырыла.

Кызыклы яңалыкларны күзәтеп бару өчен безнең МАХ каналына кушылыгыз.