«Балалар өчен» иртәнге ашлар астма китереп чыгарамы? Галимнәр куркыныч ризыклар исемлеген атаган

Әгәр бала көнлек калорияләренең 30 проценттан артыгын ультра эшкәртелгән ризыклардан алса, астма үсеше куркынычы 4 тапкырга диярлек арта.

Тикшерүдә 4–5 яшьлек 700гә якын бала катнашкан. Өч елдан артык күзәтүләр күрсәткәнчә, сәнәгатьтә җитештерелгән ризыкны еш кулланган балаларның һәр унынчысына диярлек астма диагнозы куелган. Ә рационда мондый продуктлар чикләнгән гаиләләрдә авыру бары тик 2,6 процент очракта гына теркәлгән.

Ультра эшкәртелгән ризык нәрсә ул?

Белгечләр аңлатуынча, бу — тирән сәнәгать эшкәртүе узган продуктлар. Алар арасында:

• газлы һәм татлы эчемлекләр;

• пакетлы соклар;

• шоколадлы шарлар, татлы мюсли һәм әзер боткалар;

• сосиска, казылык, бекон, наггетс;

• чипсы, крекер, сохари;

• туңдырылган пицца һәм тиз әзерләнә торган ризыклар;

• кекс, вафли, батончик, татлы йогуртлар.

Мондый ризыкларда шикәр, тоз, тәм көчәйткечләр һәм химик өстәмәләр күп була. Табиблар фикеренчә, нәкъ менә шул матдәләр балалар организмына тискәре тәэсир итә һәм сулыш юлларында хроник ялкынсыну китереп чыгарырга мөмкин.

Белгечләр ата-аналарга балалар менюсында табигый һәм яңа әзерләнгән ризыкларны күбәйтергә киңәш итә.