Башка көнне вакытың юкмы, шимбә көнне сорауларга җавап табарга була

Гадәттә, мондый көннәр айның соңгы шимбәсендә уза. Өстәмә кабул итүләр эш көннәрендә килә алмаучы кешеләр өчен махсус оештырыла.

«Безнең бурыч – халыкка мөмкин кадәр якын булу. Мондый өстәмә кабул итүләр халыкның проблемасын хәл итәргә ярдәм итү максатыннан оештырыла. Бу көнне республика халкы пенсияне рәсмиләштерү яки исәпләү, социаль түләүләр һәм пособиеләр, ана (гаилә) капиталын рәсмиләштерү һәм башка бихисап күп сорауларга җавап таба алачак», – ди Россия Социаль фондының Татарстан Республикасы буенча бүлек идарәчесе Эдуард Вафин.

Зур шәһәрләрдә – Казан, Яр Чаллы, Әлмәт, Лениногорск, Яшел Үзән, Түбән Камада кабул итү 9:00 сәгатьтән 15:00 сәгатькә, башка җирлекләрдә 9:00 сәгатьтән 12:00 сәгатькә кадәр булачак. Мөрәҗәгать иткәндә паспорт һәм тиешле хезмәтләр алу хокукын раслаучы документлар алып килергә киңәш ителә. Клиент хезмәтләренең адреслары һәм эш графигы Россия Социаль фондының рәсми сайтында урнаштырылган.

Фонд аша башкарылучы социаль ярдәм чаралары, түләүләр һәм хезмәтләр турындагы мәгълүматны рәсми сайттан һәм ВКонтакте, Одноклассники һәм Телеграмканаллардагы рәсми аккаунтлардан да  табарга була. 

Өстәмә мәгълүмат яки консультация алу өчен  – 8 800 100 0001 телефоны аша бушлай бердәм контакт-үзәк операторларына мөрәҗәгать итәргә дә мөмкин.  Әлеге телефон тәүлек әйләнәсе эшли.