Казанлыларны «Каз өмәсе» милли бәйрәменә чакыралар

Кунакларны театральләштерелгән тамаша, каз эшкәртү традицияләре һәм мичтән чыккан кайнар коймаклар көтә.

Казанның Иске Татар бистәсендә 5 ноябрьдә халкыбызның борынгы гореф-гадәтләренең берсе — «Каз өмәсе» милли бәйрәме узачак.

Бәйрәм кунаклары татар халкының кышка каз әзерләү йоласы белән таныша алачак. Программада махсус театральләштерелгән тамаша тәкъдим ителәчәк, ә каз эшкәртүнең борынгы ысуллары халык алдында күрсәтеләчәк. Моннан тыш, килүчеләрне милли татар мичендә пешерелгән кайнар коймак белән сыйлаячаклар.

«Каз өмәсе» — татар халкының хезмәт һәм бердәмлеккә нигезләнгән матур традицияләренең берсе. Гадәттә, ул беренче кышкы суыклар башлангач, ноябрь аенда үткәрелгән. Авыл халкы бергә җыелып каз эшкәрткән, эш барышында җырлаган, аралашкан, яшьләр танышкан. Шуңа күрә каз өмәсе көнкүреш хезмәте генә түгел, ә күңелле очрашу һәм аралашу бәйрәме дә булган.

Быел милли чара Шиһабетдин Мәрҗани урамындагы милли аш-су йортларында һәм аларның ишегалларында оештырылачак.

Бу хакта «Иске шәһәр» префектурасының матбугат хезмәте хәбәр итә.