БДИга – 25 ел: аны оештыручы имтихан нәтиҗәләре турында сөйләгән

Бу хакта РИА Новости агентлыгына биргән интервьюсында Россия мәгариф министры (1998–2004), Россия халыклар дуслыгы университеты (РУДН) президенты һәм БДИны оештыручыларның берсе Владимир Филиппов белдергән.

Аның сүзләренчә, БДИның ике төп бурычы бар:

• югары белем алуга тигез мөмкинлекләр тудыру;

• мәктәпне тәмамлаганда белем сыйфатын бәяләү өчен бердәм инструмент булдыру.

«Керү имтиханнарын тапшыру өчен башка шәһәргә бару кирәк түгел. БДИ — ул мәктәп белеменең финал этабындагы объектив бәясе», — дигән Филиппов.

Ул шулай ук имтихан системасы югары уку йортларына кабул итүне ачыграк иткәнен ассызыклаган. Аның фикеренчә, БДИ кертелгәнче, кайбер югары уку йортларында репетиторлык һәм әзерлек курслары аша өстәмә керем алу киң таралган булган.

«БДИ бу коррупцион механизмнарны япты», — дип билгеләгән эксперт.

Филиппов мәгълүматларына караганда, хәзер һәр предмет буенча биремнәр банкында якынча 20 мең сорау тупланган. Имтихан вакытында укучыга 20–30 бирем генә тәкъдим ителә, бу барлык мөмкин булган сорауларның бик кечкенә өлеше. Шуңа күрә БДИга махсус «тарту» мөмкин түгел — предметны чынлап белү кирәк, дип нәтиҗә ясаган ул.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.