Беренче карның кайчан төшәчәге билгеле

Күпьеллык статистика мәгълүматларына караганда, Татарстан территориясендә беренче кыраулар ешрак сентябрьнең өченче декадасында яки октябрьнең беренче декадасында төшә. Бу хакта «Татар-информ» ТР Гидрометеорология үзәге башлыгы Феликс Гогольгә таянып хәбәр итә. 

«Иң иртә кыраулар төшү датасы август ахырыннан сентябрьнең беренче декадасына кадәр үзгәреп тора», - дигән Феликс Гоголь.

Аның сүзләренчә, төбәктә беренче кар ел саен төрлечә ява. Ул сентябрьдә яки октябрьдә, ә кайчакта бик соңга калып – ноябрьдә төшәргә мөмкин.

"Республика буенча беренче тотрыксыз кар катламы уртача октябрьнең өченче декадасында барлыкка килә. Кар капламы барлыкка килүнең иң иртә даталары сентябрь ахырына туры килә", - дип өстәгән Гоголь.

Татарстанда уртача тотрыклы кар капламы ноябрьнең икенче декадасы ахырында ята. Әмма кар катламы барлыкка килүнең иң иртә вакыты октябрьнең икенче-өченче декадасына туры килә.