Бижутерия урынына — радиация: Казан таможнячылары хәвефле товар тапкан

Бу хакта Россия Федераль таможня хезмәте матбугат хезмәте хәбәр итә.

Тикшерү барышында ачыкланганча, бижутерия ясау өчен җибәрелгән товарларның гамма-нурланыш дәрәҗәсе нормадан 15 тапкырга югары булган.

Ике посылка Санкт-Петербургта яшәүче кешегә адресланган. Алар эчендә төрле төстәге ташлардан җепкә тезелгән 235 пакет төймәчекләр булган. Документларда исә алар пыяладан ясалган бизәнү әйберләре дип күрсәтелгән.

Радиация контроле чаралары эшләп киткәч, белгечләр төргәкләр өслегендәге нурланыш дәрәҗәсенең кеше сәламәтлегенә җитди куркыныч тудыруын ачыклаган. Спектрометрик анализ нәтиҗәсендә товарларда торий-232 (Th-232) радиоактив изотобы һәм бета-кисәкчекләр булуы билгеләнгән.

Куркыныч йөк Россия территориясенә кертелмәгән — посылкалар җибәрү иленә кире кайтарылган.

Белгечләр искәртә: интернет аша заказ биргәндә товарның килеп чыгышына һәм составына игътибарлы булу мөһим.