Чаллы табиблары ерткычларча кыйналган хатын-кызны үлемнән алып калган

Ерткычларча кыйналганнан соң «тормыш белән ярашмый торган» хәлдә хастаханәгә эләккән Юлия Шәрипованы табиблар үлем тырнагыннан тартып чыгарган һәм аның йөзен яңадан диярлек җыйган.

Фаҗига ЗЯБ бистәсендә булган. Төнлә ир-ат күршесенә пычак белән һөҗүм иткән. Юлия ирен якларга ташлангач, һөҗүмче аны аңын югалтканчы аяклары белән кыйнаган. Хатын-кызны бик авыр хәлдә хастаханәгә озатканнар.

Бу хәл хәтта тәҗрибәле хирургларны да тетрәндергән: хатын -кыз йөзенең урта өлеше тулысынча диярлек җимерелгән, яңак һәм борын сөякләре сынган, уң күз куенына баткан, ә бит сөякләре дистәләгән вак кыйпылчыкларга таралган булган.

Теш-казна хирургиясе бүлеге мөдире Баин Демкин сүзләренчә, табиблар алдында пациентның гомерен саклап калу гына түгел, аңа яңадан кеше йөзе кайтару бурычы да торган.

Операциягә әзерләнү өчен белгечләр 3D-технологияләр кулланган. Теш технигы Илдар Мәүлетов пациентның баш сөяге моделен ясап, махсус титан пластиналар әзерләгән. Биш сәгать дәвам иткән операция вакытында хирурглар 30га якын сөяк кыйпылчыгын берләштергән.

Табиблар хәтта йөзнең сизгерлеге өчен җавап биргән өчле нервны да саклап кала алган. Параллель рәвештә оториноларинголог Алексей Бубякин борын формасын һәм сулышын торгызган.

Хәзер Юлия тернәкләнү уза. Ул табибларга гомерен саклап калганнары өчен генә түгел, ә күрсәткән җылылык һәм ярдәм өчен дә рәхмәт белдерә.

Бу вакыйга Чаллы табибларының һөнәри осталыгын гына түгел, кешелеклелекнең дә никадәр көчле булуын күрсәтте. 30 кыйпылчыктан җыелган йөз яңадан елмая башлаячак.

Фото: Чаллы сәламәтлек идарәсе